کۆبوونەوەی گروپی ڕاوێژکاری ژنان لە هەرێمی کوردستان لە هەولێر

لە 23ی ئایاری 2023 ئەندامانی گروپی ڕاوێژکاری ژنان لە هەرێمی کوردستان لە شاری هەولێر کۆبوونەوە بۆ تاوتوێکردنی باردۆخە هەنووکەییەکانی سیاسی و ئابوری و ئاسایش کە کاریگەرییان لەسەر ژنانی کورد هەیە. گروپەکە تەواوکەری گروپی ڕاوێژکاری ژنانە لە بەغدا کە لە ساڵی 2019 دامەزراوە بۆ گفتوگۆکردن لەگەڵ یونامی لەسەر ئەو بابەتانەی کاریگەرییان لەسەر ئەجێندای ئاشتی و ئاسایشی ژنان هەیە.

بیرۆکەی پێکهێنانی گروپەکە لە هەرێمی کوردستان دوای گفتوگۆیەک لە نێوان خاتوو جینین هێنس - پلاسخارت ، نوێنەری تایبەتی سکرتێری گشتی و گروپێک لە چالاکوانانی ژنانی کورد لە تشرینی یەکەمی ساڵی ڕابردوو هاتە ئاراوە ، لە گفتوگۆکەدا ئەو بابەتانەی کاریگەرییان لەسەر کۆمەڵگەکانی ناوچەکە هەبوو، لەوانە پاراستنی ژنان  بەرزکرایەوە. پێسبینی دەکرێت گروپی ڕاوێژکاری ژنانی هەرێمی کوردستان وەک سەکۆیەک کاربکات بۆ برەودان بە بنیاتنانی هاوپەیمانی و هەماهەنگییەکی بەهێز لەنێوان ژنانی کورد لە پاشخان و بەرژەوەندی سیاسی و ئایینی و نەژادی جیاوازەوە.

بۆ ئاسانکردنی گفتوگۆکان خاتوو عایدە موئەما ڕاوێژکاری باڵای جێندەری یونامی ڕایگەیاند " چاوەڕوان دەکرێت ئەندامانی گروپی ڕاوێژکاری ژنان زانیاری و ئەزموون و تێگەیشتنی خۆیان پێشکەش بکەن بۆ پاڵپشتیکردنی ئەرکی پێراسپێردراوی یونامی لەسەر جێندەر و ژنان و ئاشتی و ئاسایش، لەوانە برەودان بە بەشداریکردنی ژنان و نوێنەرایەتیکردنیان و بەشداریکردن لە پرۆسەی سیاسی و هەڵبژاردندا."

خاتوو نەرمین عوسمان حەسەن ، وەزیری پێشووی کاروباری ئافرەتان و نووسەر لە بواری کێشەکانی ژنان ڕوونیکردەوە کە گروپە ڕاوێژکارییەکە ڕۆڵێکی سەرەکی دەبێت لە گفتوگۆکردن دەربارەی "هەڵبژاردن و دامەزراندنی ژنان لە پۆستەکانی بڕیاردان و بارودۆخی ئاوارەکان و گەڕاوەکان."

بەڕێز ڕیکاردۆ ڕۆدریگێز، بەرپرسی نوسینگەی هەرێمیی نەتەوە یەکگرتووەکان لە هەرێمی کوردستان لە میانەی بەشداریکردنەکەی هانی ئەندامانی دا کە ئەم سەکۆیە بۆ بەرەوپێشبردنی ئەجێندای ئاشتی و ئاسایشی ژنان بەکاربهێنن.

لە کۆتایی کۆبوونەوەکەدا خاتوو پەخشان زەنگەنە ، چالاکوانی سیاسی و مەدەنی ، جەختی لەسەر گرنگی کارکردن لەم گروپە لەگەڵ یونامی بۆ چارەسەرکردنی کێشە سیاسی و ئابوورییەکان  کردەوە و وتی " ئەمڕۆ کارێکی باشمان کرد. ئەو بابەتانەی تاوتوێمان کرد پەیوەندییان بە کێشە سیاسییەکان هەیە و زۆر گرنگە لە ڕوانگەی ژنانی کوردەوە گوێ لە بیرو بۆچوونەکان بگرین. هیواخوازم دوای ماوەیەک ئەم گروپە پشتگوێ نەخرێت."

خاتوو قومریە موحەمەد ، لە کۆمەڵی دادگەریی کوردستان خۆشحاڵی خۆی لە هەمبەر کارکردن لەگەڵ ژنانی دیکە لە نەتەوە و پارتە سیاسییە جیاوازەکان دەربڕی و ڕایگەیاند " ئەم سەکۆیە دەرفەتێک بۆ ژنان دەڕەخسێنێ بۆ ڕاوێژکردن و بەشداریکردن لە پرسە یەکلاکەرەوە گرنگەکان لە پێناو هەرێمی کوردستانی باشتر."

لە هەمان چوارچێوەدا، خاتوو سوعاد رەزاق لە بزوتنەوەی گۆڕان وتی " ئێمە خواستی کارکردنمان هەیە و خۆشحاڵیشین بە پاڵپشتی کردنی یونامی لێمان بۆ وەدەستهێنانی ئامانجەکانمان"