وێرکشۆپی یونامی سەبارەت بە هەمەجۆریی وەک ئامرازێک بۆ بەرەوپێشبردنی مافەکانی مرۆڤ لە هەرێمی کوردستانی عێراق

هەولێر، 25ی تەمموزی 2023- نوسینگەی مافەكانی مرۆڤی یونامی چالاكیەكی تایبەت بە هەمەجۆریی وەک ئامرازێک بۆ پێشخستن و پاراستنی مافەکانی مرۆڤ رێكخست، کە تیایدا زیاتر باس لە گرنگی مافەکانی کەمینەکان كرا. لە وێرکشۆپەکەی هەولێر ٢٧ نوێنەر لە هەریەك لە حکومەتی هەرێمی کوردستان و پێکهاتە ئیتنیكی و ئاینییە جیاوازەكان و ڕێکخراوەکانی کۆمەڵگەی مەدەنی كۆبوونەوە.

ئەو وێرک شۆپە و دوانی دیکە كە بڕیارە دواتر رێكبخرێن بەشێکن لە دەستپێشخەریی 75 ی مافەکانی مرۆڤ کە هاوكاتە لەگەڵ یادی ٧٥ ساڵەی جاڕنامەی جیهانی مافەکانی مرۆڤ. بەشداربووان باسیان لە پاشخانی مێژوویی پەسەندکردنی جاڕنامەی جیهانی مافەکانی مرۆڤ و بڕگە سەرەکییەکانی پەیوەست بە مافەکانی کەمینەکان و گرنگیی ئەو جاڕنامەیە بۆ پێشخستن و پاراستنی مافەکانی مرۆڤ لە عێراق کرد. جگە لەوەش، لە مێزگردێك تیشک خرایە سەر تەوەری – “هەمەجۆریی وەک ئامرازێک بۆ بەرەوپێشبردنی بەجیهانی بوون و دابەشنەکردنی مافەکانی مرۆڤ” کە تێیدا بەشداربووان تیشکیان خستە سەر ستراتیژییەکانی بەهێزکردنی هاوکاری لە نێوان هەموو لایەنە پەیوەندیدارەکان لەسەر بەرەوپێشبردن و پاراستنی مافەکانی کەمینەکان لە هەرێمی کوردستان.

لە وتەكەیدا، نوێنەری وەزارەتی ئەوقاف و کاروباری ئایینی هەرێمی كوردستانی عێراق، بەڕێز مەریوان نەقشبەندی، جەختی لە “گرنگی جاڕنامەی جیهانی مافەکانی مرۆڤ بۆ بەدیهێنانی مافەکانی مرۆڤ لە جیهاندا، بە تایبەتیش مافی مرۆڤی هەموو عێراقییەکان و دڵنیابوون لە لێپرسینەوە لە پێشێلکارییەکان” کردەوە. نوێنەری کۆمیسیۆنی باڵای مافەكانی مرۆڤی عێراقی لە هەرێمی كوردستانی عێراق، بەڕێز فەیسەڵ محەمەد، تیشکی خستە سەر ئەو هەوڵ و كۆششە زۆرەی کە تا ئێستا دراون و جەختی لەوە کردەوە کە پێویستە ئەو هەوڵانە زیاتر بکرین، بەتایبەتی لە بوارەکانی جێبەجێکردنی یاسا و گۆڕینی سیاسەتەکانی پەیوەست بە پێکهاتەکانی عێراق.

یەکێک لە چالاكوانانی مەدەنی بەشداربوو ووتی: “هەوڵەکانی یونامی زۆر بەرز دەنرخێنم چونکە دەرفەتی بۆ ڕەخساندووین کە گفتوگۆ بكەین لەسەر چۆنیەتی چارەسەرکردنی ئەو کێشە زۆرانەی کە کەمینەکان لە عێراق ڕووبەڕوویان دەبنەوە. من بەوپەڕی خۆشحاڵییەوە چاوەڕێی بەشداریکردنی زیاتری لەو جۆرەم لە داهاتوودا”.

چالاکییەکە هاوكات بوو لەگەڵ ئامانجی شازدەیەم لە گەشەپێدانی بەردەوام: پێشخستنی کۆمەڵگەی ئاشتیخواز و گشتگیر بۆ گەشەپێدانی بەردەوام و دابینکردنی گەیشتن بە دادپەروەری بۆ هەمووان و بنیاتنانی دامەزراوە کاریگەر و بەرپرس و گشتگیرەکان لە هەموو ئاستەکاندا.