جێنین هێنیس پلاسخارت، نوێنەری تایبەتی سکرتێری گشتی نەتەوە یەکگرتووەکان بۆ عێراق، لەگەڵ نوێنەرانی رێکخراوەکانی کۆمەڵگەی مەدەنیدا کۆدەبێتەوە

خاتوو جینین هێنیس پلاسخارت، نوێنەری تایبەتی سکرتێری گشتی نەتەوە یەکگرتووەکان لە عێراق، بە یاوەری بەڕێز کلۆدیۆ کۆردۆن، جێگری نوێنەری تایبەت بۆ کاروباری سیاسی و هاریکاریی هەڵبژاردن، لەگەڵ نوێنەرانی کۆمەڵگەی مەدەنی عێراق، لەسەر داوای خۆیان، کۆبووەوە بۆ گفتوگۆکردن لەسەر مشتومڕی بەردەوام لەسەر زاراوەی وەك "ڕەگەز"، "یەکسانی" و "بەهێزکردنی ژنان".

بەرێز ڤۆلکێر تورك، کۆمیساری باڵای مافەکانی مرۆڤی نەتەوە یەکگرتووەکان، لە سەردانەکەیدا بۆ عێراق لە هەفتەی ڕابردوودا، ڕایگەیاند کە ئەم زاراوانە بە شێوەیەکی گشتگیر قبوڵکراون و زۆر گرنگن، لەنێو چەندان شتی تریش، بۆ بەرەنگاربوونەوەی جیاکاری. جەختیشی کردەوە: "بەکارهێنانی ئەم دەستەواژانە دژایەتیکردنی هیچ کولتوور و ئایین و نەریتێك نییە".

لە کۆبوونەوەی ئەمڕۆدا، نوێنەری تایبەت هێنیس-پلاسخارت وتی: "زۆربەی ئەو قسە زاڵانە زیانبەخشن، کە دەبێتە هۆی هەڕەشە و تۆقاندنی جددی. هەروەها سەرقاڵمان دەکات لە ئاستەنگە زۆرەکانی تایبەت بە داهاتووی عێراق. زانیاری ناڕاست یان هەوڵدان بۆ قەدەغەکردنی دەستەواژە قبووڵکراوە جیهانییەکان یارمەتی عێراق نادات بۆ گەیشتن بە سەقامگیری و خۆشگوزەرانی. تەواو پێچەوانەکەیە. ئەو ماف و ئازادییانەی لە دەستووری عێراق و جاڕنامەی گەردوونی مافی مرۆڤدا هاتووە، کە عێراق ٧٥ ساڵ لەمەوبەر لە کۆبوونەوەی گشتی نەتەوە یەکگرتووەکاندا دەنگی بۆ داوە، هەموو عێراقییەکان دەگرێتەوە".