وتاری نوێنەری تایبەتی سکرتێری گشتی نەتەوە یەکگرتووەکان بۆ عێراق - بیست و دووەمین ساڵیادی بۆردومانی هۆتێل کەناڵ

خاوەنشکۆ، جەنابی سەرۆك،

بەڕێز جەنابی وەزیر،

سوپاس پێزانینمان هەیە بۆ ئامادەبوونتان لەم بۆنە خەمگینەدا. هەم ماییەی سەربەرزییە بۆ ئێمە و هەم نیشانەی خەمخۆریتانە کە ئەمڕۆ لێرە بەخێرهاتنتان بکەین لە کاتێکدا کۆبووینەتەوە بۆ یادکردنەوە و بیرکردنەوە.

میوانە بەڕێزەکان، هاوکاران، هاوڕێیان،

بیست و دوو ساڵ لەمەوبەر، پاشنیوەڕۆی ئەمڕۆ، هۆتێل کەناڵ بە ڕیتمەکانی کاری ڕۆژانە زیندوو بوو. تەلەفۆنەکان زەنگیان لێدا، کاغەزەکان دەنگیان دەهات و گفتوگۆی بەپەلە لە بابەتێکەوە بۆ بابەتێکی تر دەڕۆیشت. لە چرکەیەکدا ئەو ڕۆژە ئاساییە نەما. یەك تەقینەوە ڕۆتینی گۆڕی بۆ کارەسات.

ئەو ڕۆژە بیست و دوو هاوکار و هاوڕێمان لەدەستدا، لەنێویاندا نوێنەری تایبەتی سکرتێری گشتی نەتەوە یەکگرتووەکان، سێرجیۆ ڤیێرا دی مێلۆ. زیاتر لە ١٥٠ کەس بریندار بوون. ئەمڕۆ هەندێك لە ڕزگاربووان لەگەڵمانن. ئێمە لێرە بە هاودەنگی لەگەڵ ئەوان و بنەماڵەکانیان وەستاوین.

ئەو ڕۆژە وەرچەرخانێکی مێژووی بوو بۆ نەتەوە یەکگرتووەکان. هێرشێکی بە ئەنقەست و بەرفراوان بوو بۆ سەر ڕێکخراوەکەمان. برینێك بوو بۆ کۆمەڵگای مرۆیی و لێدان بوو لە خەڵکی عێراق کە ئەوکاتەش ئازارەکانیان بێئەندازە بوو.

لە ساڵی 2009 ئەنجوومەنی گشتی نەتەوە یەکگرتووەکان ڕۆژی 19ی ئابی وەك ڕۆژی جیهانی مرۆیی دەستنیشان کرد. ئەمە ڕۆژێکە بۆ ڕێزلێنان لەو کەسانەی لەژێر ئاڵای نەتەوە یەکگرتووەکاندا خزمەت دەکەن، ئەوانەی لە بەغدا و لە قەیرانەکانی تردا لە شوێنەکانی تردا گیاننیان لەدەستداوە.

تەنها لە ساڵی ڕابردوودا ٣٩٠ کرێکاری مرۆیی کوژراون، کە بە بەراورد بە ساڵی ٢٠٢٣ بە ڕێژەی ٣١% زیادی کردووە و زۆربەیان هاوکارانی نیشتمانین. زۆرترین ژمارەی کوژراوان لە غەززە و سودان بووە. ئێمە پێزانینمان هەیە بۆ ئازایەتیان و پابەندبوونمان نوێ دەکەینەوە بۆ گەیاندنی فریاگوزاری و هیوا بەخشین بەو کەسانەی کە زۆرترین پێویستییان پێیەتی.

وەك سکرتێری گشتی ئەنتۆنیۆ گۆتێرێس لێرەدا لەم یادەوەرییەدا لە کاتی سەردانەکەیدا بۆ عێراق لە مانگی ئایاردا ئاماژەی پێکردووە، و منیش وەریدەگرم: "19ی ئاب بۆ هەمیشە لە ڕۆژێکی ترسناك و کارەساتێکی خەیاڵنەکراوەوە لێرە لە عێراق گۆڕا بۆ ڕۆژێکی جیهانی یادکردنەوەی ڕێزلێنان بۆ هەموو مرۆڤدۆستان - لە ناوەوە و دەرەوەی ڕێکخراوەکە".

خاوەنشکۆ، جەنابی سەرۆك،

هاوکارانی خۆشەویست،

یادی ئەمساڵ مانای تایبەتی هەیە. دواهەمین یادکردنەوە دەبێت وەك یونامی. لەگەڵ کۆتایی ئەمساڵ، ئەرکی نێردەکەش کۆتایی دێت. بەڵام ئەو بەهایانەی ئەمڕۆ ڕێزیان لێدەگرین بە یونامی کۆتایی نایەت.

نەتەوە یەکگرتووەکان بەردەوام دەبێت لە کارکردن شانبەشانی گەل و سەرکردایەتی و حکومەتی عێراق و وەك هەمیشە بە ڕێنمایی بنەماکانی میساقی نەتەوە یەکگرتووەکان کاردەکات. ئێمە لە ڕاپەڕاندنی کارەکانماندا سوپاسگوزاری خۆڕاگریی گەلی عێراقین بۆ ئەو متمانەیەی کە بە ئێمەیان داوە، تەنانەت لە سەختترین کاتەکانی دوای ساڵی ٢٠٠٣شدا. هەرچییەکمان دەستکەوت، پێکەوە وەك هاوبەش بەدەستمان هێنا. پێشکەوتنەکانیش لە سەرەتا و لە کۆتاییشدا هی عێراق و گەلی عێراقە.

با ئەمڕۆ ئەو بیست و دوو کەسە لەبیر نەکەین کە گیانیان لەپێناو خزمەتکردندا بەخشی و ئەو ڕزگاربووە ئازا و هاوکارانەی کە تا ئێستاش لە سەختترین شوێنەکانی جیهان خزمەت دەکەن، هەروەها بۆ گەلی عێراق کە قوربانییەکی زۆریان لە پێناو وڵاتەکەیاندا داوە. 

بۆ بنەماڵەکانیان، کە قورسترین بارگرانی هەڵدەگرن، ئێمە لەگەڵ ئێوەدا وەستاوین.

با یادی ئەوان ڕێنیشاندەری خزمەتەکەمان بێت.

با کارەکانمان شایەنی قوربانیدانیان بێت تا دوا ڕۆژی ئەرکەکەمان.

سوپاس.