لێدوانی ئەنجومەنی ئاسایشی نەتەوە یەکگرتووەکان دەربارەی هێرشەکانی ئەمدواییە لە عیراق

ئەندامانی ئەنجومەنی ئاسایش هاوخەمی خۆیان و پرسەوسەرەخۆشی خۆیان بۆ خانەوادەی قوربانیان و حکومەتی عیراق دەربڕی و هیوای هەرچی زووچاکبوونەوەشیان بۆ برینداران خواست.

ئەندامانی ئەنجومەنی ئاسایش پاڵپشتی خۆیان بۆ سەربەخۆیی و سەروەریی و یەکپارچەیی خاك و پڕۆسەی دیموکراسی و پێشکەوتنی عیراق دووپاتکردەوە.

 ئەندامانی ئەنجومەنی ئاسایش دووبارە ڕایانگەیاند کە کاری تیرۆرستی بە هەموو شێوە و ئامانجەکانیانەوە بریتین لە گەورەترین مەترسی بۆ سەر ئاشتی و ئاسایشی نێودەوڵەتی.

ئەندامانی ئەنجومەنی ئاسایش جەختیان لەسەر گرنگیی سزادانی ئەو کەسانە کردەوە کە ئەنجامدەر و ڕێکخەر و دابینکاری دارایی و پاڵپشتی ئەو کارە قێزەوەنانەن و بیاندەنە دەست دادگا. هەروەها داوایان لە هەموو وڵاتان کرد، بە پێی پابەندییەکانیان لەژێر یاسای نێودەوڵەتی و بڕیارە پەیوەندیدارەکانی ئەنجومەنی ئاسایش، کە هاریکاری کارای حکومەتی عیراق و هەموو دەسەڵاتە پەیوەندیدارەکان لەمبارەوە بکەن.

ئەندامانی ئەنجومەنی ئاسایش دووبارەیانکردەوە کە هەموو کارێکی تیرۆرستی تاوانە و بەهانەی نیە جا هەر مەبەستێکیان هەبێت لە هەر شوێنێك و لە هەر کاتێك و لەلایەن هەرکەسێکەوە ئەنجامبدرێت. داوایان لە هەموو وڵاتەکان کرد کە بە هەموو شێوەیەك ڕووبەڕووی مەترسییەکانی سەر ئاشتی و ئاسایشی نێو دەوڵەتی لەلایەن کردەی تیرۆرستییەوە ببنەوە، بە گوێرەی میساقی نەتەوە یەکگرتووەکان و پابەندییەکانی یاسای نێودەوڵەتی بە یاسای مافی مرۆڤی نێودەوڵەتی و یاسای نێودەوڵەتی پەنابەران و یاسای نێودەوڵەتی مرۆییشەوە.

ئەندامانی ئەنجومەنی ئاسایش دووپاتی پاڵپشتی خۆیان بۆ ئاسایشی عیراق و ڕووبەڕووبوونەوەی بەردەوامی تیرۆر بە شەڕی  تیرۆرستانی داعشیشەوە. 

۲٤ی کانونی دووەمی ۲۰۲۲

(وەرگێڕانی نافەرمی لەلایەن نوسینگەی ڕاگەیاندنی یونامی)