ڕێکخراوی نێودەوڵەتی کۆچ (IOM) پێشوازی لە بڕیاری بەڕێوەبەرایەتییەکانی پەروەردەی سەڵاح الدین و نەینەوا دەکات بۆ پاراستنی مافی خوێندنی منداڵان

لە مانگی شوباتدا، (IOM) لە عێراق پێشوازی لە بڕیارێکی بەڕێوەبەرایەتی پەروەردەی پارێزگای نەینەوا (DoE) کرد کە ڕێگە بە منداڵانی بێ ناسنامە و ئەو منداڵانەی بەڵگەنامەکانیان ناتەواوە لە خوێندن بەردەوام بن و کارت و بڕوانامەی دبلۆمی ئامادەیی لە کۆتا ساڵی خوێندنی قوتابخانە بەدەستبێنن دوای ئەوەی کە بەڵگەنامە شارستانییەکانیان پێشکەشدەکەن. ئەم بڕیارەش هاندەر و پێشینەیەکی یاسایی هەیە لەبەرئەوەی بڕیارێکی هاوشێوە لە پارێزگای سەڵاح الدین لە کۆتایی مانگی کانوونی یەکەم دەرچوو. ئەم بڕیارانەش دوای هەوڵ و کۆششێکی چڕی داکۆکیکردن و ڕاوێژکردن لەگەڵ دەسەڵاتدارە خۆجێیەکان و بەشداری ڕاستەوخۆی بەرپرسانی بەڕێوەبەرایەتی پەروەردە و تیمی یاسایی (IOM) لە عێراق دا دران. پێشبینی دەکرێت زیاتر لە ٣٠٠٠ هەزار منداڵی بێ بەڵگەنامە و بێ ناسنامە لەم گۆڕانکاریانە سوودمەندبن.

تاکو ئەم دواییانە و سەرەڕای فەرمانێکی وەزارەتی پەروەردە، دەسەڵاتەکانی ئاستی پارێزگا لە هەموو پارێزگاکانی عێراق دا پێویستبوو منداڵان بەڵگەنامە و ناسنامەی شارستانیان هەبێت تاوەکو بتوانن بچنە قوتابخانە، ئەمەش کێشەیەکی گەورەی بۆ ئەو منداڵانە دروستکردبوو کە ئەو بەڵگەنامە و ناسنامە مەدەنیانەیان نییە یان وونبووە یان لە کاتی ئاوارەبوون لەناوچووە و نەماوە. هەروەها ئەو منداڵانەشی لەکاتی دەگیرکاری داعش دا لە دایکبوون ئەو بەڵگەنامە و ناسنامانەیان بۆ دەرنەهێنراوە یان بەڵگەنامەکە و ناسنامەکەی لەلایەن دەسەڵاتدارانی عێراقەوە دانی پێدانەنراوە.

سەرۆکی نێردەی گشتی (IOM) لە عێراق جۆرجی گیگاوری گووتی "ئەم بەرەوپێشچوونە یارمەتیدەردەبێت لە چارەسەرکردنی یەکێک لە سەخترین ئەو کێشانەی کە ڕووبەڕووی خێزانە گەڕاوەکان و خانەوادە کەمدەرامەت و بێ دەرتانەکان دەبووە لە پارێزگاکانی سەڵاح الدین و نەینەوادا سەبارەت بە چوونە قوتابخانەی منداڵان و چوونە بەر خوێندنی فەرمی. ئەم دەستکەوتە هانی (IOM) دەدات کە هەوڵ و کۆششەکانی زیاتر بکات لە پاڵپشتیکردنی پڕۆسەی چوونە بەر خوێندن بۆ ئەو هاوڵاتیانەی کە شوێنیان جێگیر نییە و ڕاگواستراون و، هاوکات یەکدەگرێتەوەش لەگەڵ پابەندبوونەکانی عێراق لە ژێر ڕێککەوتننامەی جیهانی بۆ کۆچ".

هەبوونی بەڵگەنامە و ناسنامەی شارستانی مافێکی سەرەکی و بنەڕەتی مرۆڤە. دەستەبەرکردنیشی و بۆ گەیشتن و پیادەکردنی مافەکانی دیکە پێویستە، لەوانەش: خوێندن، تەندروستی، شوێنی پێویست و تەواوی نیشتەجێبوون، ئازادای جوڵەو هاتووچۆ و پڕۆسە یاساییەکان. لە بارودۆخی ئاوارەبوون دا و چارەسەرە بەردەوامەکان، هەبوونی بەڵگەنامە و ناسنامەی شارستانی شتێکی بنەڕەتیە تاوەکو ئەو ئاوارە ناوخۆییانە بتوانن گەڕانەوەیەکی ئارەزوومەندانە و جێگیریان هەبێت و بگەنە چارەسەرێکی هەمیشەیی بۆ ئاوارەبوونیان، لەبەرئەوەی ئەو بەڵگەنامەیە یارمەتیدەریان دەبێت بتوانن دەستیان بە خزمەتگوزارییەکانی حکومەت بگات، هەروەها چارەسەری بەربەستێکی سەرەکی بەردەم گەڕانەوە و یەکخستنی خۆجێی ئاوارەکان دەکات لە ناوچەی زێدی خۆیان دا، لەپاڵ ئەمانەشدا، تەبایی کۆمەڵایەتی زیاتر دەکات و دابەشکاری کۆمەڵایەتی کەمدەکاتەوە.

هەروەها تیمی پرۆگرامی یاسایی (IOM) لە عێراق پاڵپشتی ئەو کۆمەڵگەیانەی بەئامانجگیراوان دەکات بە پێدانی خزمەتگوزاری یاسایی بەشێوەیەکی ڕاستەوخۆ لەبارەی ناسنامە و بەڵگەنامە، نیشتەجێبوون، مافی موڵک و زەوی زار، یاسای خێزان و هەروەها کار و چالاکی بنیاتنانی توانا بۆ دەسەڵاتداران و گروپەکانی نێو کۆمەڵگە، ئەمەش بەمەبەستی زیاتر گێڕانەوەی توانای کەسی و کۆمەڵەیی بەرانبەر بە شەڕ و ململانێ و هۆیەکانی سەرهەڵدانی توندوتیژی.

ئەو هەوڵ و کۆششانەی تیمی پرۆگرامی یاسایی (IOM) لە عێراق بۆ دەرکردنی بڕیارەکانی بەڕێوەبەرایەتیەکانی پەروەردە بەسوپاسەوە بەپاڵپشتی حکومەتەکانی ئەڵمانیا و کەنەدا ئەنجامدرا.