پەیامی سکرتێری گشتی نەتەوە یەکگرتووەکان لە ڕۆژی جیهانی نەهێشتنی توندوتیژی دژی ژنان

هەر ١١ خولەك جارێك، ژنێك یان کچێك لەلایەن کەسێکی نزیکی یان ئەندامێکی خێزانەکەیەوە دەکوژرێت — و دەزانین کە فشارەکانی دیکە، لە پەتای کۆڤید-١٩ەوە تا گێژاوی ئابووری، بە ناچاری دەبنە هۆی ئازاردانی جەستەیی و زارەکی زیاتر.

هەروەها ژنان و کچان ڕووبەڕووی توندوتیژییەکی بەربڵاوی ئۆنلاین دەبنەوە، لەوتەی دژە ژنەوە، تا دەگاتە ئازاردانی سێکسی، خراپ بەکارهێنانی وێنە و دەستەمۆکردنی نێچیرەکانەوە.

ئەم جیاکاری و توندوتیژی و خراپ مامەڵەکردنەی کە نیوەی مرۆڤایەتی دەکاتە ئامانج، باجێکی گەورەی هەیە. بەشداری ژنان و کچان لە هەموو چین و توێژەکانی ژیاندا سنووردار دەکات، ماف و ئازادییە سەرەتاییەکانیان ڕەتدەکاتەوە و ڕێگری لە بوژانەوەی ئابووری و گەشەسەندنی بەردەوام دەکات کە جیهانەکەمان پێویستی پێیەتی.

ئێستا کاتی گۆڕانکارییە بۆ کۆتاییهێنان بە توندوتیژی دژی ژنان و کچان.

ئەمەش واتای ئەوەیە کە حکومەتەکان پلانی کارکردنی نیشتمانی داڕێژن و پارەیان بۆ دابین دەکەن و جێبەجێی بکەن بۆ بەرەنگاربوونەوەی ئەم بەڵایە.

واتە بەشداریکردنی خەڵکانی ئاسایی و کۆمەڵگەی مەدەنی لە هەموو قۆناغێکی بڕیاردان.

واتە دڵنیابوون لەوەی کە یاساکان جێبەجێ دەکرێن و ڕێزیان لێدەگیرێت، بۆ ئەوەی ڕزگاربووان ببینن کە مافەکانیان بۆ دادپەروەری و پشتیوانیکردن بەرز دەنرخێندرێت.

بە واتای پشتگیریکردن لە هەڵمەتە گشتیەکان کە تەحەدای نۆرمەکانی پیاوسالاری دەکەن و ژنکوژی و توندوتیژی ڕەتدەکەنەوە.

هەروەك تەوەری ئەمساڵ "یەکگرتن: چالاکیی بۆ کۆتاییهێنان بە توندوتیژی دژی ژنان و کچان" — بیرمان دەخاتەوە، بە واتای وەستان لەگەڵ چالاکوانان لە سەرانسەری جیهان کە داوای گۆڕانکاری دەکەن و پشتگیری لە ڕزگاربووانی توندوتیژی دەکەن. داوا لە حکومەتەکان دەکەم تا ساڵی ٢٠٢٦ پشتگیری دارایی بۆ ڕێکخراو و بزووتنەوەکانی مافی ژنان بە ڕێژەی لەسەدا ٥٠ زیاد بکەن.

با هەڵوێستمان هەبێت و دەنگمان بەرز بکەینەوە بۆ پشتیوانی لە مافەکانی ژنان.

با بە شانازییەوە ڕایبگەیەنین: هەموومان فێمینیستین.

با توندوتیژی دژی ژنان و کچان بخەینە دەست کتێبەکانی مێژوو.