سکرتێری گشتی نەتەوە یەکگرتووەکان خاتوو جینین هێنیس-پلاسخارتی هۆڵەندی وەك ڕێکخەری تایبەت لە لوبنان دەستنیشان دەکات

ئەمڕۆ، ئەنتۆنیۆ گۆتێرێس، سکرتێری گشتی نەتەوە یەکگرتووەکان، ڕایگەیاند کە خاتوو جینین هێنیس-پلاسخارتی هۆڵەندی وەك ڕێکخەری تایبەتی نوێی خۆی بۆ لوبنان لە نووسینگەی ڕێکخەری تایبەتی نەتەوە یەکگرتووەکان بۆ لوبنان (UNSCOL) دەستنیشان کردووە.

خاتوو هێنیس-پلاسخارت شوێنی جوانا ڤرۆنێکای پۆڵەندی دەگرێتەوە، کە سکرتێری گشتی سوپاسگوزارە بۆ پابەندبوون و سەرکردایەتیکردنی نووسینگەی ڕێکخەری تایبەتی نەتەوە یەکگرتووەکان بۆ لوبنان (UNSCOL).

لە ئێستادا خاتوو هێنیس-پلاسخارت وەك نوێنەری تایبەتی سکرتێری گشتی بۆ عێراق و بەرپرسی نێردەی نەتەوە یەکگرتووەکان بۆ هاریکاریی عێراق (لە ساڵی ٢٠١٨ەوە)، زیاتر لە ٢٥ ساڵ ئەزموونی لە بواری دیپلۆماسی و ئاسایشی نێودەوڵەتی و کاروباری ڕۆژهەڵاتی ناوەڕاستدا دەهێنێتە ئەم پۆستە. پێش ئەوەش وەزیری بەرگری هۆڵەندا بووە (٢٠١٢ - ٢٠١٧) – یەکەم ژن بووە کە ئەم پۆستەی وەرگرتووە. پێشتریش وەك ئەندامی ئەنجومەنی نوێنەرانی هۆڵەندا (٢٠١٠ - ٢٠١٢) و وەک ئەندامی پەرلەمانی ئەوروپا (٢٠٠٤ - ٢٠١٠) کاری کردووە. هەروەها خاتوو هێنیس-پلاسخارت لە کۆمیسیۆنی ئەوروپا لە بەلجیکا و لاتڤیا کاری کردووە، هەروەها لە شارەوانی ئەمستردام و لە کەرتی تایبەتیش کاریکردووە.

 خاتوو هێنیس-پلاسخارت شارەزایە لە زمانەکانی ئینگلیزی و فەرەنسی و ئەڵمانی و زمانی هۆڵەندیش زمانی ڕەسەنی خۆیتی.