نەتەوە یەکگرتووەکان و عێراق پلانی «یەک نەتەوە یەکگرتووەکان» بۆ پشتگیریکردن لە گەڕانەوە و دووبارە شیاندنەوە و تێکەڵکردنەوەی عێراقییەکانی کەمپی ئەلهۆلیان دەستپێکرد

ئەم چالاکییە لە ناوەندی نەهرەین لە بەغدا بەڕێوەچوو، کە تیایدا نوێنەرە باڵاکانی حکوومەتی عێراق و نەتەوە یەکگرتووەکان و کۆمەڵگەی دیپلۆماسی و ھاوکارانی نێودەوڵەتی ئامادە بوون .

لەم مەراسیمەدا ، دکتۆر موحەمەد ئەلحەسان ، نوێنەری سکرتێری گشتی نەتەوە یەکگرتووەکان و سەرۆکی نێردەی یونامی لە عێراق وتی " سەرکردایەتی عێراق لە ئاسانکردنی گەڕانەوەی هاووڵاتییانی  لە باکووری ڕۆژھەڵاتی سووریا، نموونەیەکی ئەرێنی جیھانیی بەرجەستە کردووە . ئەم دەستپێشخەرییە گشتگیر و ئازایانە لەلایەن بەرزترین ئاستەکانی نەتەوە یەکگرتووەکانەوە ستایشکراوە، بە خودی سکرتێری گشتیشەوە"  لە درێژەی وتەکەیدا وتی  " ئێستا کاتی داخستنی ئەم پەڕاوەیە  و لاپەڕەی هەڕەشەکانی داعشیش دابخرێت. ئەم پڕۆژەیە پڕۆژەیەکی ئالنگارانەیە و چارەسەرکردنیشی  بەپێی پێوەرە نێودەوڵەتییەکان و بە شێوەیەک کە لەگەڵ ئاستی ئەم وڵاتەدا بگونجێت کە شارستانیەتی مرۆڤایەتیی دروستکردووە، نیشانەی چاکبوونەوەی عێراقە ."

لە لایەن خۆشیەوە ، بەڕێز قاسم ئەعرەجی ، ڕاوێژکاری ئاسایشی نیشتمانیی عێراق سوپاسی هەموو هاوبەشیکارە حکومیی و نێودەوڵەتییەکانی کرد لەهەمبەر هەوڵەکانیان و گرنگی خێراکردنی پڕۆسەی گەڕانەوە و داخستنی کەمپی هۆڵی خستە ڕوو و ھەروەھا داوای لە ھاوبەشیکارانی نێودەوڵەتی کرد کە بەردەوام بن لە پشتگیریکردنی عێراق لەم ھەوڵەدا.

پلانی «یەک نەتەوە یەکگرتووەکان» لە ساڵی ٢٠٢١ ەوە پشت بە ھەوڵەکانی عێراق دەبەستێت بۆ گەڕانەوە و دووبارە شیاندنەوە و تێکەڵکردنەوەی هاووڵاتییانی بەتایبەتی ژنان و منداڵان کە لە بارودۆخێکی سەخت و ناڕێکدا ژیاون لە کەمپی هۆڵ. زیاتر لە ٦٠٪ ی  عێراقییەکانی ناو کەمپەکە منداڵی خوار تەمەن  ١٧ ساڵی و ٢٠٪  یان خوار ٥ ساڵن، زۆربەیان لە مافە بنەڕەتییەکانی وەک پەروەردە و فێرکردن بێبەشن . بە درک کردن بە بارودۆخی خراپی مرۆیی و ئاسایش لە کەمپی هۆل ، حکوومەتی عێراق سەرەڕای بوونی چەندین بەربەست  پڕۆسەی گەڕانەوەی خێراکردووە. نەتەوە یەکگرتووەکان ستایشی پەرۆشیی عێراقی بۆ چارەسەرکردنی ئەم کێشەیە کردووە  و دووبارە گرنگی بەھێزکردنی میکانیزمەکانی هەماهەنگی نیشتمانیی و بەھێزکردنی دەسەڵاتە ناوخۆییەکان بۆ بەردەوامی پێشکەوتنەکان دووپات کردەوە.

پلانی «یەک نەتەوە یەکگرتووەکان: دەستپێکردنێکی نوێ» بەشێکە لە چوارچێوەیەکی جیھانیی گەورەتر و لە ڕێگەی گرووپێکی کاری تەکنیکی دامەزراو لە نێوان نەتەوە یەکگرتووەکان و حکوومەتی عێراقەوە جێبەجێ دەکرێت.