وتاری نوێنەری تایبەتی سکرتێری گشتی نەتەوە یەکگرتووەکان بۆ عیراق و بەرپرسی (یونامی) لە میانی چالاکییەکدا کە لەلایەن نەتەوە یەکگرتووەکانەوە لە عیراق ڕێکخرابوو بۆ ئاهەنگگێڕان بەبۆنەی هەڵبژاردنی بەغدا وەك پایتەختی گەشتیاری عەرەبی بۆ ساڵی ٢٠٢٥

جەنابی بەڕێز دکتۆر ئەحمەد فەکاك ئەلبەدرانی، وەزیری ڕۆشنبیری و گەشتوگوزار و دێرینەکان

میوانە بەڕێزەکان، خوشك و برایان 

شانازییە ئەمڕۆ لەبەردەمتان بوەستین لەکاتێکدا ئاهەنگ دەگێڕین بە بۆنەی دەستکەوتێکی گەورە - ئەویش هەڵبژاردنی بەغدایە وەك پایتەختی گەشتیاری عەرەبی بۆ ساڵی ٢٠٢٥.

ئەم دانپێدانانە گرنگە بەڵگەیە لەسەر میراتی دەوڵەمەندی کولتووری عیراق و ڕەنگدانەوەی ئەو پێشکەوتنە بەرچاوەیە کە وڵاتەکە لە ساڵانی ڕابردوودا بەدەستی هێناوە بەرەو ئاسایش و سەقامگیری و گەشەپێدان.

ئەمڕۆ ڕێز لە شارێك دەگرین کە بەرگەی سەختییەکی لە ڕادەبەدەری گرتووە، وەك هێمای خۆڕاگری و شارستانیەت و مێژوو و کولتوور سەریهەڵداوە. ئەمە شاری ئەلڕەشیدە، پایتەختی ئەدەب و زانست و داهێنان بووە بۆ چەندین سەدە.

عیراق، خاکی میزۆپۆتامیا، بەڕاستی لانکەی شارستانییەتە. ئەمە ئەو شوێنەیە کە مێژوو نووسراوەتەوە و یەکەم یاسای ئەبەدی بە دەستی مرۆڤ نووسراوە و یەکەم شارەکانی لێ بنیات نراوە و لێرەشەوە مەعریفە گەشەی کردووە.

لە سۆمەرییە کۆنەکانەوە تا دەگاتە بابلییەکان و ئاشوورییەکان، ئەم خاکە پێشکەوتنی بێهاوتای لە نووسین و یاسا و حوکمڕانی و زانستدا بەخشیوە بە مرۆڤایەتی. بەتایبەتی بەغدا، لەمێژه پایتەختی فکریی جیهان بووه و هەرواش دەمێنێتەوه، شوێنی خانەی گەورەی حیکمەت بووە، کە زانایانی شارستانییه جیاوازەکان بۆ پێشخستنی زانست و داهێنان تیایدا کۆبوونەتەوە.

ئەم دانپێدانانە وەك بانگهێشتێك بۆ دۆزینەوەی گەنجینەی مێژوویی و کولتووری فراوانی عیراق کاردەکات. سەردانکەرانی ئەم خاکە گەورە و پیرۆزە شاهیدی جوانیی دەوڵەمەند و هەمەچەشن و مێژووی ڕەگداکوتاوی و گەرمیی و بەخشندەیی گەلەکەی دەبن.

نەتەوە یەکگرتووەکان پیرۆزبایی خۆی ئاراستەی سەرکردایەتی عیراق و گەلی عیراق دەکات بەبۆنەی ئەم دەستنیشانکردنە شایستەیە و هەروەها بەوپەڕی خۆشحاڵییەوە چاوەڕێی ئەوە دەکەین بەغدا لەسەر نەخشەی گەشتیاری جیهانی بدرەوشێتەوە.

بانگهێشتی گەشتیارانی عەرەب و سەردانکەران لە سەرتاسەری جیهان دەکەین، بۆ ئەوەی بەنێو ئەم شارە ناوازەیەدا بگەڕێن و ئەزموونی سۆز و خۆشەویستییە تایبەتەکەی بکەن.

لە دڵەوە سوپاسی هەمووتان دەکەم کە ئەمڕۆ لێرە ئامادەبوون.

سوپاس