عێراق و نەتەوە یەکگرتووەکان تاوتوێی پێکهێنانی کۆمەڵێکی ڕاوێژکاریی لە بواری ژینگە و گۆڕینی کەش و هەوا دەکەن بۆ ڕووبەڕووبوونەوەی پیس بوون و ئاڵنگارییە بەردەوامەکان

بەغدا، 11ی 2025 – وەزارەتی ژینگەی عێراق و نەتەوە یەکگرتووەکان گفتوگۆیان دەربارەی پێکهێنانی کۆمەڵێکی ڕاوێژکاریی لە بواری ژینگە و گۆڕینی کەش و هەوا کرد، بۆ ڕووبەڕووبوونەوەی ئالنگارییە ژینگەییەکان بە پیسبوونی هەوای شارە گەورەکانی عێراقیشەوە. ئەم کۆمەڵە ڕاوێژکارییە دەبێتە سەکۆیەک بۆ هەماهەنگیکردن لە نێوان کۆششە نیشتمانییەکان و نێودەوڵەتییەکان و هەروەها بۆ دەستنیشانکردنی کارە هەرە لەپێشینەکانی بواری ژینگە و پتەوکردنی هاوبەشییکردنی جیهانی.

ئەم گفتوگۆیانە لە کۆبوونەوەیەکی دوێنێی نێوان دکتۆر هەڵۆ عەسکەری، وەزیری ژینگەی عێراق و ‌غولام ئیسحاقزای، جێگری نوێنەری تایبەتی سکرتێری گشتی نەتەوە یەکگرتووەکان و هەماهەنگیکاری نیشتەجێ و مرۆیی لە عێراق ، ئەنجامدرا. نوێنەرانی چەندین ڕێکخراوی سەر بەنەتەوە یەکگرتووەکانی وەک بەرنامەی نەتەوە یەکگرتووەکان بۆ گەشەپێدان (UNDP) و ڕێکخراوی خۆراک و کشتوکاڵ (FAO) و بەرنامەی خۆراکی جیهانی (WFP) و نوێنەری بانکی نێودەوڵەتیی و برپرسانی باڵای وەزارەتی ژینگە لە کۆبوونەوەکە ئامادە بوون.

کۆمەڵی ڕاوێژکاریی لە بواری ژینگە و گۆڕینی کەش و هەوا لە شارەزایانی نیشتمانی و نێودەوڵەتی و ئەکادیمییانی زانکۆ و پەیمانگاکانی توێژینەوە لە عێراق و نوێنەرانی گەنجان و نوێنەرانی نووسینگەی سەرۆک وەزیران و وەزارەتی ژینگە و دام و دەزگا پەیوەندارەکان لە هەردوو کەرتی گشتی و تایبەت پێکدێت.