خاتو جینین هێنیس پلاسخارت، نوێنه‌ری تازه‌ی سكرتێری گشتی نه‌ته‌وه یه‌كگرتووه‌كان، به‌ڵێنی پشتگیری بۆ هه‌ڵسانه‌وه‌ی دوای شه‌ڕی عیراق ده‌دات
١٧ کانونی یەکەم ٢٠١٨
به‌غدا، عیراق، ١٧ی كانونی یه‌كه‌می ٢٠١٨- دوای ده‌ستبه‌كاربونی ئه‌مڕۆ وه‌ك نوێنه‌ری تایبه‌تی سكرتێری گشتیی نه‌ته‌وه یه‌كگرتووه‌كان و سه‌رۆكی یونامی خاتو جینین هێنیس پلاسخارت، به‌ڵێنی درێژه‌پێدانی پشتگیری بۆ عیراق دوای هه‌ڵسانه‌وه‌ی له قۆناغی دوای شه‌ڕدا.
دوای ده‌ربڕینی خۆشحاڵی خۆی بۆ ده‌ستبه‌كاربونی له عیراق ئه‌و خاتونه وتی "ئێمه درێژه به هه‌وڵه‌كانمان ده‌ده‌ین بۆ پشتگیریكردن له عیراق وه‌ك وڵاتێكی تازه‌هه‌ڵساوه‌ی دوای قۆناغی شه‌ڕی تیرۆر كه ئێستا به دوای ئاینده‌یه‌كی پڕشه‌نگداره‌وه‌یه. من بۆ ئه‌مه‌ش پشت به كارمه‌نده به ئه‌زمونه‌كانی یونامی و خانه‌واده‌ی نه‌ته‌وه یه‌كگرتووه‌كان له عیراق ده‌به‌ستم له‌گه‌ڵ سه‌رباركردنی هاوكاریی دانسقه‌ی به‌رده‌وامی وڵاتی خانه‌خوێش بۆ ئه‌وه‌ی بتوانێن به یه‌كه‌وه به‌رنامه‌كانمان جێبه‌جێ بكه‌ین به مه‌به‌ستی خزمه‌تكردنی عیراق و عیراقییه‌كان. من به نیازم كه خۆشگوزه‌رانیی عیراقییه‌كان بكه‌مه كاری سه‌رلیست و كاریش بۆ ئه‌م ئامانجه بكه‌م له بواره‌كانی ئاسایش و مرۆیی و سیاسی و ئابوری و گه‌شه‌پێداندا."
ئه‌و خاتونه به ره‌چه‌ڵه‌ك هۆڵه‌ندییه و خاوه‌نی ٢٠ ساڵ ئه‌زمونه له بواری سیاسی و دیپلۆماسی و له چه‌ندان پله‌ی باڵای حكومی و په‌رله‌مانی كاری كردووه. ئه‌و له نێوان ساڵه‌كانی ٢٠١٢-٢٠١٧ وه‌زیری به‌رگریی هۆڵه‌ندا بووه. ئه‌و هه‌روه‌ها له نێوان ساڵه‌كانی ٢٠١٠-٢٠١٢شدا ئه‌ندامی په‌رله‌مانی هۆڵه‌ندا بووه دواتریش له نێوان ساڵه‌كانی ٢٠٠٤-٢٠١٠ ئه‌ندامی په‌رله‌مانی ئه‌وروپا بووه و هه‌روه‌ها له كۆمیسیۆنی ئه‌وروپاش له برۆكسل و ریگا و لاتڤیا و شاری ئه‌مستردام كاری كردووه.
به‌ڕێز ئه‌نتۆنیۆ گوتێرێس، سكرتێری گشتیی نه‌ته‌وه یه‌كگرتووه‌كان، ئه‌و خاتونه‌ی له ٣١ی ئابی ٢٠١٨دا وه‌ك نوێنه‌ری خۆی له عیراق دامه‌زراند وه‌ك جێگره‌وه‌ی یان كوبیشی نوێنه‌ری پێشووی كه له ماوه‌ی ٤ ساڵی رابردوودا له هه‌مان پێگه‌دا خزمه‌تی كرد.
سه‌مير غه‌تتاس
نوسينگه‌ى راگه‌ياندنى يونامى
ڕێکخراوە بەشداربووەکانی سەر بە نەتەوە یەکگرتووەکان لەم دەستپێشخەرییە
ئەو ئامانجانەی لە ڕێگای ئەم دەستپێشخەریەوە پشتگیریان لێدەکرێت
