نووسینگەی مافەكانی مرۆڤی یونامی لە شاری کەرکوک مێزگردێكی لەسەر لێپرسینەوە لە توندوتیژی خێزانی ڕێکدەخات

کەرکوک، ١٨ی تەمموزی ٢٠٢٣ - نووسینگەی مافەكانی مرۆڤی یونامی لە شاری کەرکوک، مێزگردێكی سەبارەت بە لێپرسینەوە لە توندوتیژی خێزانی ڕێکخست. چالاكیەكە لایەنی بەرپرسی جیاجیای پێكەوە كۆكردەوە، لەوانە نوێنەرانی ڕێکخراوە ناحکومییەکان و یەكەكانی پاراستنی خێزان و كۆمسیۆنی باڵای عێراقی بۆ مافەكانی مرۆڤ و ڕۆژنامەنووسان و پیاوانی ئایینی سەر بە پارێزگاکانی کەرکوک و دیالە و سەڵاحەدین. ئامانجی کۆبوونەوەکە بریتی بوو لە هەڵسەنگاندنی ئاستەنگەکانی ئێستای پەیوەست بە توندوتیژی خێزانی و ئاڵوگۆڕی ئەزموون پێشنیار و سوودوەرگرتن لە ئەزموونی پێشتر لە ڕوانگەی جیاوازەوە.

نوسینگەی مافەكانی مرۆڤی یونامی تێڕوانینێکی گشتی لە چوارچێوەی یاسای نێودەوڵەتی سەبارەت بە توندوتیژی دژی ژنان و کچان پێشکەش بە بەشداربووان کرد. دواتر بابەتێك لەلایەن نوێنەرانی یەکەکانی پاراستنی خێزان سەبارەت بە ڕۆڵ و ئەرکەکانیان پێشکەشکرا. پاشان بەشداربووان بەكۆمەڵ، بۆ لێپرسینەوە لە توندوتیژی خێزانی، باسیان لە كیشەی پراکتیکی و یاسایی ئێستا کرد لە عێراق و دواتر کۆمەڵێک ڕاسپاردەیان سەبارەت بە هەنگاوی گونجاو بۆ چارەسەرکردنی ئەو كێشانە خستەڕوو.

هەموو بەشداربووان جەختیان لەسەر پێویستی بوونی یاسای نوێ سەبارەت بە توندوتیژی خێزانی کردەوە، ئەمەش بۆ هۆشیارکردنەوەی زیاتر لەناو کۆمەڵگا سەبارەت بە دەرئەنجامە نەرێنییەکانی توندوتیژی خێزانی و نەهێشتنی ئەوەی پێی دەگوترێ ئابڕووچونی ناو كۆمەڵگا  کە زۆرجار پەیوەستە بە توندوتیژی خێزانی.

ئەم چالاکییە بەشداری کرد لە بەدیهێنانی ئامانجی پێنجەم لە گەشەپێدانی بەردەوام لە عێراق: بەدیهێنانی یەکسانی جێندەری و بەهێزکردنی هەموو ژنان و کچان و ئامانجی شازدەیەم لە گەشەپێدانی بەردەوام: پێشخستنی کۆمەڵگەی ئاشتیخواز و گشتگیر بۆ گەشەپێدانی بەردەوام، دابینکردنی گەیشتن بە دادپەروەری بۆ هەمووان و بنیاتنانی دامەزراوە کاریگەر و بەرپرس و گشتگیرەکان لە هەموو ئاستەکاندا.