پەیامی نوێنەری تایبەتی سکرتێری گشتی نەتەوە یەکگرتووەکان بۆ عێراق، جێنین هێنیس پلاسخارت، بەبۆنەی ڕۆژی نەتەوە یەکگرتووەکانەوە

ئەم ئاواتانەش لەوپەڕی گرینگیدایە لێرە بۆ بارودۆخی ڕۆژهەڵاتی ناوەڕاست و بۆ تەواوی جیهانیش گونجاوە.

لەگەڵ درێژەکێشانی شەڕە کارەساتبارەکان و ناکۆکییەکانی ناوە و دەرەوەش، نەتەوە یەکگرتووەکان هەر درێژە بە ڕۆڵی ناوازەی خۆی دەدات. ئەو لەگەڵ چەندین هاوبەشکاری تریدا و هەندێ جار هەتتا لە بارودۆخی زۆر سەختیشدا کار بۆ نەهێشتنی توندوتیژی و چارەسەرکردنی شەڕەکان دەکات لەپێناو سووککردنی کاریگەرییە نەرێنییەکانیان لەسەر خەڵکی مەدەنیی لێقەوماو لە ڕێگەی دابینکردنی یارمەتیی مرۆیی زۆر پێویستەوە.

نەتەوە یەکگرتووەکان، لە عێراق و شوێنەکانی تری جیهانیشدا، بێ جیاوازی خزمەتی هەموو خەڵک دەکات لە هەموو کەرتەکانی کۆمەڵگادا و لەگەڵ کارکردنیشی لەگەڵ دامودەزگا نیشتمانییەکان و ڕێکخراوەکانی کۆمەڵگەی مەدەنیشدا بۆ بەرەوپێشبردنی ئاواتەکانی هەمووان. شایانی باسە، عێراق خۆی ئەندامی دامەزراندنی نەتەوە یەکگرتووەکانە و دەمێکیشە بەشداریی لە کارەکانی ئەو رێکخراوەدا هەبووە. ئێمە هەر هەموومان کارێکمان هەیە ئەنجامی بدەین کە ئەویش بریتییە لە گەشەپێدانی ئاشتی و دادوەری و گەشەپێدانی درێژخایەن.

بەهاو و بنەمای نەتەوە یەکگرتووەکان، هەتتا لە ڕۆژانی هەرە سەخت و دژواریشدا، مایەی هیوای ئاشتی و یەکبوونی جیهانە. ئێمە سەڕی ڕێز بۆ هاوپیشەکانمان لەسەرتاسەری جیهاندا دادەنەوێنین کە هەندێکیان لە بارودۆخی زۆر دژواردا کار دەکەن و بەمەش یادی ئەوانەش دەکەینەوە کە گیانی خۆیان بەخت کرد. ئێمە هەروەها پابەندیی خۆشمان بۆ مەبەست و بنەماکانی دەستووری نەتەوە یەکگرتووەکان دووپات دەکەینەوە کە لە ڕۆژێکی وەک ئەمڕۆی ساڵی ١٩٤٥ دا کەوتە بواری جێبەجێکردنەوە.