یونامی کەرنەڤاڵێکی کەلتووری بۆ ئاهەنگگێڕان بەبۆنەی دەستنیشانکردنی بەغدا وەک پایتەختی گەشتیاریی عەرەب بۆ ساڵی ٢٠٢٥ ساز دەکات

بەغدای پایتەختی عێراق لەلایەن رێکخراوی گەشتیاریی عەرەبەوە وەک پایتەختی گەشتیاریی عەرەب بۆ ساڵی ٢٠٢٥ دەسنیشانکرا. بۆ ئاهەنگگێڕانیش بەم بۆنەیەوە، ئەمڕۆ نێردەی نەتەوە یەکگرتووەکان بۆ عێراق (یونامی) کەرنەڤاڵێکی کەلتووری لە بارەگای خۆی لە بەغدا ساز کرد کە بووە مایەی پێشکەشکردنی نمایشێکی کەلتووری لە مۆسیقا و هەڵپەڕکێ.

لە کەرناڤەڵەکەدا، دکتۆر موحەممەد مەشهەدانی، سەرۆکی ئەنجومەنی نوێنەرانی عێراق و دکتۆر ئەحمەد فەکاک بەدرانی، وەزیری رۆشنبیری و گەشتیاری و چەندین وەزیر و نوێنەرانی دیپلۆماسی و بەرپرسانی عێراق و باڵیۆزی وڵاتان ئامادە بوون.

هەروەها، لەلایەکی ترەوە، پارێزگاری بەغداش بازاڕێکی رێکخست بۆ نمایشکردنی بەرهەمە هونەری و کارە دەستییەکان کە گوزارشتیان لە دەوڵەمەندیی عێراقیان بە شوێنەوار و پیشەگەری دەخستە ڕوو.