نووسینگەی مافەکانی مرۆڤی نێردەی نەتەوە یەکگرتووەکان بۆهاوکاری عێراق (یونامی) دیالۆگێک سەبارەت بە بەرەنگاربوونەوەی ووتاری ڕق و کینە لە هەرێمی کوردستان ڕێکدەخات

هەولێر، 8ی نیسانی 2025- نووسینگەی مافەکانی مرۆڤی نێردەی نەتەوە یەکگرتووەکان بۆ هاوکاری عێراق (یونامی) دیالۆگێکی تایبەت بە بەرەنگاربوونەوەی ووتاری ڕق و کینە لە هەرێمی کوردستانی عێراق ڕێکخست. لە چالاکییەکەدا ١٨ بەشداربوو (پێنج ئافرەت و ١٣ پیاو) بە نوێنەرایەتی حکومەتی هەرێمی کوردستان و کۆمەڵگەی مەدەنی و کۆمیسیۆنی سەربەخۆی مافی مرۆڤی هەرێمی کوردستان و یەکەی جێندەری یونامی ئامادەبوون. بەشداربووان جەختیان لە گرنگی چارەسەرکردنی پرسی ووتاری ڕق و کینە کردەوە بۆ بەرەوپێشبردنی یەکگرتوویی کۆمەڵایەتی و پێکەوەژیانی ئاشتیانە. هەروەها جەختیان لەسەر پێویستی دەرکردنی یاسایەکی تایبەت کردەوە وەک ڕێکارێکی یاسایی بۆ بەرەنگاربوونەوەی ووتاری ڕق و کینە لە هەمان کاتدا دڵنیابوون لە پاراستنی ئازادی ڕادەربڕین.

هەروەها گفتوگۆکان چەختیان کردەوە لەسەر ڕۆڵی میدیا و سۆشیال میدیا و دیدگای پێکهاتە نەتەوەیی و ئایینییەکانی کۆمەڵگا و گرنگی پاراستنی ژنان لە ووتاری ڕق و کینە، بەتایبەتی ئەو ووتارانەی کاندیدەکانی ژن لە هەڵبژاردنەکان و ئافرەتانی کایەی گشتی دەکەنە ئامانج.

ئەم دیالۆگە دەرفەتێکی چاکی ڕەخساند بۆ بەرزکردنەوەی هاوکاری و گفتوگۆ لە نێوان لایەنە پەیوەندیدارە سەرەکییەکان بۆ بەهێزکردنی هەوڵە دەستەجەمعیەکان لە ڕێگەی گرتنەبەری ڕێوشوێنی یاسایی و سیاسەتەوە بۆ بەرەنگاربوونەوەی ووتاری ڕق وکینە لە هەرێمی کوردستانی عێراق.