دکتۆر محەمەد ئەلحەسان، نوێنەری تایبەتی سکرتێری گشتی نەتەوە یەکگرتووەکان بۆ عێراق و سەرۆکی نێردەی یونامی، سڵاو بۆ کۆمەڵگای یەزیدی دەنێرێت بەبۆنەی سەری ساڵی تازەی یەزیدییەوە

ئەم بۆنەیە دەرفەتێکە بۆ ئاهەنگگێڕان بە شارستانیی دەوڵەمەندی ئەم کۆمەڵگایە دێرینە و هەروەها بۆ ڕێزگرتن لە قوربانییەکان و کۆڵنەدەریشیان لە هەمبەر ناخۆشییەکان و ئاڵنگارییەکاندا کە بوونە مایەی زیاتر بەهێزکردنی ویستیان بۆ گەڕان بەدوای دادپەروەری و ژیانی شکۆمەندانەدا.

نەتەوە یەکگرتووەکان لە عێراق پابەندیی نەگۆڕی خۆی بۆ پشتگیریکردنی کۆمەلگای یەزیدی دووپات دەکاتەوە بۆ هێنانەدی هەڵسانەوە و بووژانەوەیەک کە کاتێک دەتوانین بڵێین تەواوە گەر هەموو خەڵکی ئاوارە بگەڕێنەوە سەر زێدی خۆیان بەشێوەیەکی سەلامەت و شکۆمەندانە و چارەنووسى سەرجەم ونبووەکان ئاشکرا بکرێت و رفێندراوەکان بە ئەزیزانیان شاد ببنەوە و ئەنجامدەرانی تاوان دژی ئەم خەڵکە ئەزیزە پەلکێشی بەردەم دادگا بکرێن و یەزیدییەکانیش لە عێراقی خۆشگوزەران و گەشەکردوودا بە مافی تەواوی خۆیان شاد بووبن.

ئێمە بەم بۆنە تایبەتەوە پشتگیرى خۆمان و هاوکاریی بەردەوامیشمان بۆ خەڵکی یەزیدی دووپات دەکەینەوە بۆ بەدیهێنانى مافەکانیان لە بەدەستهێنانی ئایندەیەکی دادپەروەر و پڕ لە ئاشتی و شکۆی مرۆڤایەتی.

ساڵی تازەتان پیرۆز بێت.