جەختکردنەوە لەسەر هەڵبژاردنێکی پاک و بێگەرد و شەففاف کە یونامی و کۆمیسیۆنی باڵای سەربەخۆی هەڵبژاردنەکان تاوتوێی ئامادەکارییەکان هەڵبژاردن دەکەن

لای خۆیەوە، دکتۆر موحەممەد ئەلحەسان، نوێنەری تایبەتی سکرتێری گشتی نەتەوە یەکگرتووەکان بۆ عێراق و سەرۆکی نێردەی یونامی، بەخێرهاتنی سەرۆکی کۆمیسیۆن و دەستی کۆمیسارانی کرد لەگەڵ ئاماژەکردن بە رۆڵی بنچینەیی کۆمیساران لە جێبەجێکردنی پرۆسەکە بەشێوەیەکی پاک و بێگەرد کە هەم لەلایەن عێراقەوە بەڕێوەدەبرێت و هەمیش هەر خۆی خاوەنیەتی.

 بەڕێز ئەلحەسان ئەوەی دووپات کردەوە کە پاراستنی سەربەخۆیی کۆمیسیۆن و بەهێزکردنی متمانەی عێراقییەکان بەردی بناغەی سەرکەوتوویی هەڵبژاردنەکانن و جەختی لەسەر گرینگیی ئەم هەڵبژاردنە کردەوە لە پتەوکردنی سەقامگیریی عێراق و بەهێزکردنی دامودەزگا دیموکراسییەکانی و شێوازەکانی حوکمرانی باش.

هەر لەم سیاقەدا، ئەو داوای لە پارتە سیاسیەکان کرد بۆ پەیڕەوکردنی پەیمانی شەرەف بۆ ئەنجامدانی هەڵبژاردنێکی ڕێکوپێک و ئارام و متمانەدار و هەروەها بۆ خۆدوورگرتن لە بەکارهێنانی پارە بۆ مەبەستی سیاسی لەگەڵ دابینکردنی سەربەخۆیی و بێخەوشیی هەڵبژاردن. ئەو هەروەها دووپاتی ئەوەشی کردەوە کە پرۆسەکە پێویستە گشتگیر و خزمەتی هەموو عیراقییەکان بکات بێگوێدانە مەزهەب و نەتەوە و بیروباوەڕی ئاینی لەگەل جەختکردنەوەشی لەسەر گرینگیی بەشداریکردنی ژنان و کەمینەکان.