ووتەی بەرپرسی نوسینگەی مافەکانی مرۆڤی یونامی بەڕیز ڕوپێرت وایت بەبۆنەی ڕۆژی نیشتیمانی ئافرەتانی عیراقەوە

سوپاس کە ئەم دەرفەتەتان پێدام ئەمڕۆ لەگەڵتان بم بۆ بەرز ڕاگرتنی بۆنەیەکی گرنگ کە ئەویش ڕۆژی نیشتیمانی ئافرەتانی عیراقە.

ئێمە ئەمڕۆ، هەموو ئەو بەشدارییە بڕبەهایانەی ئافرەتانی عێراق بەرز دەنرخێنین کە لە پێناو پێشکەوتنی  ئەم ووڵاتەدا پێشکەشیان کردووە. هەروەها ئاهەنگ دەگێڕین و هەوڵەکانی هەموو ئەو ژن و کچانە بەرز دەنرخێنین  کە بە داواکردنی مافەکانیان ویستویانە عێراق دادپەروەرانەتر و ئاوەدانتر و خۆڕاگرتر بکەن.

عێراق چەندین هەنگاوی گرنگی ناوە بەرەو فراوانکردنی دەرفەت بۆ ژنان و کچان، بەتایبەتی لەڕێگەی جێبەجێکردنی ستراتیژیی نیشتمانی بۆ ئافرەتانی عێراق و پلانی کاری نیشتمانی سەبارەت بە ژن و ئاشتی و ئاسایش.

لەسەر بنەمای ئەم دەستکەوتانە، یونامی بەوپەڕی خۆشحاڵییەوە چاوەڕێی پشتگیری و هەوڵەکانی عێراق دەکات بۆفەراهەمکردنی یەکسانی ئافرەتان لە تەواوی کایە ئابووری و کۆمەڵایەتی و کولتوورییەکان، بەمەبەستی  بەهێزکردنی نوێنەرایەتی سیاسی ژنان لە هەڵبژاردنەکانی داهاتووی ئەنجومەنی نوێنەران و دڵنیابوون لەوەی کە ژنان لە سەرانسەری ووڵاتدا بە تەواوی لە مافە مرۆییەکانیاندا سوودمەند دەبن.

بەداخەوە لەئێستادا ئالنگاریەکان بەردەوامن و زۆرێک لە ژنان و کچان لە عێراقدا بەردەوامن لە ڕووبەڕووبوونەوەی ئاستەنگەکان بۆ دەستڕاگەیشتن بە تەواوی مافەکانیان، لەوانەش، یاساکانی جیاکاری و دەربازبوون لە سزای تاوانەکانی توندوتیژی خێزانی و دەستڕاگەیشتن بەیەکسانی بە دەرفەتە کۆمەڵایەتی و ئابووری و سیاسییەکان.

مافەکانی ئافرەتان بەتەنها  چەند بیرۆکە نین. هەموو ئەو پێوەرە نێودەوڵەتییانەی کە عیراق پابەند بووە بە ڕێزگرتنیان و  ڕێگرن لە جیاکاری لە دژی ژنان، چوارچێوەیەکی نۆرماتیڤی گرنگ دەستەبەردەکەن بۆ پاراستنیان لەدژی هەر توندوتیژی و پێشێلکاری و ئازارێکی دیکەوە، وە دڵنیایی دەدەن بە هەموو کەسێک لە هەر شوێنێک تا بتوانن بە شکۆمەندی و ڕێزەوە بژین.

پشتگیریکردن و برەودان بە مافەکانی ئافرەتان تەنها پەیوەندی بە چارەسەرکردنی نادادپەروەرییەکانی ئێستاوە نییە، بەڵکو هاندانی هەموومانە بۆ ئەوەی پێکەوە یەکبگرین بۆ دروستکردنی داهاتوویەکی دادپەروەرتر و یەکسانتر.

دەمەوێت لەم دەرفەتەدا سوپاس و پێزانینی خۆم بۆ کۆمیسیۆنی باڵای مافەکانی مرۆڤ لە عێراق دەرببڕم بۆ میوانداریکردنی ئەم بۆنە گرنگە، چونکە پابەندبوونی ئەوان بە مافەکانی مرۆڤ بەردەوامە لە پێشخستنی کارنامەی مافەکانی ژنان لە عێراقدا.  

لە کاتێکدا ئەمڕۆ ئاهەنگ دەگێڕین، با پابەندبوونی خۆمان بە خێراکردنی پێشکەوتنەکانیش دووپات بکەینەوە- وە دڵنیابین لەوەی کە هەموو ژن و کچێک لە عێراقدا دەرفەتی یەکسانیان بۆ دەڕەخسێت بۆدروستکردنی کۆمەڵگایەک کە هەموو ئافرەتان بتوانن دوور لە ترس و ستەم و نایەکسانی بژین.     

نەتەوە یەکگرتوەکان پاڵپشتی لە عیراق و ئافرەتانی عیراق دەکات لەگەیشتن بەم ئامانجانە، وە ئێمە بەیەکەوە دەتوانین ئایندەیەک بنیات بنێین کە تیایدا ژنان نەک تەنها بەشدار بن لە گفتوگۆکان بگرە سەرکردایەتیشیان بکەن – لە داڕشتنی دوواڕۆژی عێراق بۆ نەوەکانی داهاتوو. 

زۆر سوپاس