ئۆفیسی مافەکانی مرۆڤی یونامی مێزگردێک ڕێکدەخات بۆ یادکردنەوەی ڕۆژی جیهانی ئافرەتان 2025

هەولێر، 6ی ئازاری 2025- ئۆفیسی مافەکانی مرۆڤی نێردەی نەتەوە یەکگرتووەکان بۆ هاریکاریی عێراق (یونامی) مێزگردێکی لە شاری هەولێر سازکرد بۆ یادکردنەوەی ڕۆژی جیهانی ئافرەتان 2025. لە چالاکییەکەدا 18 کەس (11 ئافرەت و 7 پیاو) بە نوێنەرایەتی حکومەتی هەرێمی کوردستان و کۆمەڵگەی مەدەنی و دەستەی سەربەخۆی مافەکانی مرۆڤی هەرێمی کوردستانی عێڕاق و UN WOMEN و UNFPA بەشداربوون. بەشداربووان پابەندبوونیان نوێکردەوە بۆ پاراستنی مافەکانی ئافرەتان لەژێر تەوەری ئەمساڵدا "بۆ هەموو ئافرەتان و کچان: ماف. یەکسانی. تواناسازی" و گفتوگۆیان دەربارەی دەستکەوت و ئاستەنگ و ڕێوشوێنە پێویستەکان کرد بۆ خێراکردنی پێشکەوتن لە بەدیهێنانی توانای ڕاستەقینەی ئافرەتان و کچان و هەروەها بەرزکردنەوەی بەشداریکردنی کاریگەریان لە هەموو بوارەکانی ژیاندا، لەوانەش بواری پەروەردە و تەندروستی و حوکمڕانی و بڕیاردان.

بەشداربووان جەختیان لە گرنگیی بەهێزکردنی دامودەزگاکانی سەروەری یاسا و دادپەروەری کردەوە، ئەمەش لەپێناو پاراستنی ئافرەتان لە توندوتیژی و دەستەبەرکردنی لێپرسینەوە. هەروەها باسیشیان لە پێویستی بەرزکردنەوەی ڕۆڵی ئافرەتان کرد لە بەرەوپێشبردنی یەکگرتوویی کۆمەڵایەتی و پێکەوەژیانی ئاشتیانە و بەرەنگاربوونەوەی ووتاری ڕق و کینە لە دژی ئافرەتان و جەختکردنەوەیەکی تایبەت لەسەر پاراستنی ئافرەتانی سەر بە پێکهاتە کۆمەڵایەتییەکانی عێراق و بەرزکردنەوەی ئابووری و کۆمەڵایەتییان.

ئەم چالاکییە دەرفەتێکی ڕەخساند بۆ بەهێزکردنی هاوکاری و گفتوگۆ لە نێوان لایەنە پەیوەندیدارە سەرەکییەکان، ئەمەش بە مەبەستی بەرزکردنەوەی هەوڵە بەکۆمەڵەکان بۆ بەهێزکردنی ئافرەتان و کچان لە هەرێمی کوردستانی عێراق.

#رۆژی_جیهانی_ئافرەتان